“قوليلي ازاي” قصيدة لـ الشاعر كامل كمال من ديوان سوبرانو

كامل كمال 13 ديسمبر 2017 | 5:28 م شعر, شعر عامي 218 مشاهدة

"قوليلي ازاي" قصيدة لـ الشاعر كامل كمال من ديوان سوبرانو

قوليلي إزاي ؟
اقول لك بُكره في كفوفي ريحان طارح
وانا سارح ….بدوّر ليا على خندق ؟
وانا إمبارح ….بيتشعلق في ديلي زي عيل تاه
في هوجة قول وليل كداب… صبح أصدق
اقابل حلمنا بينا على الناصية
و أصلا ً كل حوارينا …طايلها القصف
ياحلوة فوق حدود الوصف
لكين عيني عماها بارود ما بيفرّقش
مابين عاشق وبين كافر
وع الآخر ..ملوني وطفطفوا كيلهم
لقوني نهار .طفوني وطوّلوا ليلهم
رموني ف بحر ليس كمثل
ما بيرويش ولا يغرقش
قوليلي إزاي ؟
اطاوع روحي واتخيّل عيال ليناهناك جايين؟
يحبوا ف بعض بسم النفط
ويتقاتلوا بإسم الدين
قوليلي إزاي؟
اقول لِك شعر مستوزر بشوق وحنين؟
مقضي الليل ينادي طيفك البهتان على مرايته
واوصف سهمك الدبّاح لتغريبتي
في دنيا ما فيها يستاهل سوى ضحكِك
وإنك لسه معشوقة
وإنك نبضي…والشوقة
قوليلي إزاي؟
وانا وجعي على الإنسان حزام ناسف
محاوط ضحكتي الأيتم من المطاريد
أحاول ألملم الكلمة مدد ومديد
“بحبِّك” جوا قلبي تبان على لساني. “أنا آسف “